Ниту еден друг проект во периодот по осамостојувањето на Република Македонија немал зад себе толку голема поддршка од граѓаните кои во континуитет ја подржуваа визијата на државното раководство за демократска трансформација на сегментите на одбраната и безбедноста како предуслови за влез во најсилната воено - политичка Алијанса во историјата.

По конфликтот во 2001 година, за многу кус временски период во Република Македонија го направивме она што според многумина изгледаше тешко остварливо: од консументи на воена помош, се трансформиравме во субјект кој, во соработка со нашите пријатели и партнери од евро-атлантска заедница придонесува за безбедноста на регионот и пошироко. Денес, Република Македонија е дел од глобалната анти-терористичка коалиција во Ирак и Авганистан каде што нашата воена мисија, иако малубројна, на убедлив начин докажува дека малите држави не се разликуваат од големите кога се верува во заедничките вредности и се придонесува кон истата цел.

Во овој момент, Република Македонија ги има дефинирано сите стратешки документи неопходни за интегрална, транспарентна и демократска трансформација на сегментот на одбраната на државата. Структурните реформи во Армијата се во завршна фаза и според релевантни проценки, нашите постигнувања, во тој сегмент, на сите нивоа кореспондираат со стандардите на Алијансата. Армијата на Република Македонија во овој момент е профилирана и оспособена да исполни три фундаментални мисии: заштита на суверенитетот и независноста на земјата; подршка на службите за примена на законот при спротиставување на новите и неконвенционални закани за демократијата и декларирани сили за учество во меѓународните мисии за чување на мирот.

Во тој контекст, мораме до крај да го завршиме мошне важниот процес на реална интеграција на припадниците на етничките заедници во структурите на одбраната и безбедноста што ќе има исклучително значење за стабилноста и идниот развој на државата. Тоа ќе значи заокружување на активностите за етаблирање на ефикасни и кредибилни институции неоптоварени со етнички или политички предзнак во кои сите наши граѓани ќе имаат целосна доверба.

Последниве години Република Македонија е предводник и на квалитативно новата етапа во регионалната соработка во областа на одбраната на Балканот, каде што до неодамна државите повеќе се конфронтираа отколку што соработуваа меѓу себе, користејќи ги за деструктивни цели токму ресурсите во оваа област. Во тој контекст, Јадранската Повелба во која сме заедно со Хрватска и Албанија и со стратешкиот партнер САД, во изминативе две години изврши силно влијание врз градењето на новата клима на доверба во регионот и промовирање на концептот на стабилност и безбедност на Балканот.

Во многу тешки периоди од најновата историја на војни и деструкција на Балканот Република Македонија се однесуваше како де факто членка на НАТО и како докажан партнер на Алијансата и на меѓународната заедница кои беа сигурни дека на своја страна има атипична балканска држава која практикува меѓуетнички дијалогот и толеранцијата кога во нашето опкружување постоеја многу спротивни примери.

Заклучоците од Самитот на НАТО во Истанбул во 2004 година во кои се вели дека Република Македонија направила значаен прогрес во реформите претставуваат потврда добиена од највисоко ниво дека сме на вистинската патека. Токму од тие причини на следниот самит на НАТО со право очекуваме да ја добиеме поканата за членство, убедени дека навистина ја заслужуваме.

Широкиот политички, меѓуетнички и граѓански консензус кој го имаме во континуитет им дава легитимитет на нашите напори за интегрирање во евроатланската заедница. Денес, кога сме на чекор од тоа историско постигнување, мораме да продолжиме да генерираме стабилност и демократија во поширокиот регион и на тој начин да преземеме уште поголема одговорност во сеуште чувствителното опкружување.